Атам Менен Апама Курбанбай Эшим

Мээнет кылып ак маңдайың тердетип
Мыйзамы күч турмуш менен элдешип
Балдарыңа бакыт болдуң атаке
Бул турмуштун бүт түйшүгүн тең кечип

Атам барда дүйнөм түгөл баары шат!
Апам күлсө ай ааламга шаң учат
Аттиң бирок аппак кылып чачтарын
Артта калбай мезгил кошо жарышат

Баарыбызга кубат болуп ак сүтүң
Башка учурга окшобогон жакшы күн
Таалайыбыз бүтүн апа сени менен
Тилек кылган балдарынын бактысын

Карек жашып нени гана көз көрбөйт
Кара башың кандай күндү өткөрбөйт
Адам тургай аалам кетет өзгөрүп
Атаң колдоп апаң сүйөт өзгөрбөйт